زوجة الظابط إلي اتخطف فين ؟ جوزها رجع بالسلامة ؟
أخت الجيزاوي فين ؟ الجيزاوي خرج الحمد لله ؟
سميرة ابراهيم فين؟ مش السيسي ده إلي عملك كشف العذرية ؟ أنا شايف انها مبسوطة أوي بإلي حصل ، عندك تفسير ؟
ألتراس أهلاوي ظروفهم ايه دلوقتي ؟ مش إلي قتل اخواتكم في بورسعيد هما إلي ماسكين الحكم انهاردة ؟ ولا مطلعوش اخواتكم ؟ أخبار أنس - تقبله الله في الشهداء - ايه ؟
شباب ستة ابريل أخبار المجلس العسكري ايه ؟ مش الرويني هو إلي كان قال عليكم بتقبضوا من برة ؟ مبسوطين دلوقتي برجوع المجلس ليه ؟ قبضتوا من برة فعلا ؟
إلا أخبار الشباب الثوري الطاهر الجميل في موضوع حكم العسكر ايه ؟ جربتوه ومطلعش وحش ؟
إلا شباب حزب النور أخبار الظباط الملتحين ايه ؟ مش ناويين تنظموا مؤتمر لنصرتهم ولا ضربة البيادة صعبة حبتين ؟
إلا شباب الإخوان أخبار نقاب زوجة السيسي ولحية ابن محمد ابراهيم ايه ؟ ديه قلعت وده حلق ولا ايه ؟
بتوع لا للمحاكمات العسكرية للمدنيين ، خير ؟ بعافية حبتين ولا ايه ؟
بتوع طول ما الدم المصري رخيص يسقط يسقط أي رئيس ، وانتم عاملين ايه دلوقت ؟ بتحسبوا لسة ثمن الدم المصري بكام ؟
بتاع مظاهرات الملابس الداخلية قدام بيت وزير الداخلية ، ايه النظام ؟ الملابس الداخلية غليت ؟ مش شايفين رجولتكم دلوقتي ؟
إلا الإخوة بتوع الدعوة السلفية أخبار الإختراق الشيعي لمصر ايه ؟ خلص الحمد لله ؟
إلا الجماعة بتوع اخوان من عسكر متفرقش ، ازي الحال دلوقتي ؟
إلا صحيح هو عصام العريان كان بيقول ان التيار الإسلامي كله لا يتكلم على الجيش إلا حازم صلاح لأنه عنده وساوس من الإنقلاب العسكري ، ربنا ييسرلك ويحميك بس يا ريت نسمع وجهة نظرك دلوقتي !
محكتوليش يعني قناة السويس اتباعت بكام ؟ والسودان دفعت كام بقرة في حلايب ؟ ويا ترى لقيتوا ال 8 مليار إلي خيرت الشاطر باع بيهم سينا ولا لأ ؟
مقولتوليش إلي كانوا بيقولوا لو مبارك خد براءة هننزل التحرير ملط ، شايفكم دلوقتي يعني ماسكين في الأستك ! خيرا ؟ مش رجالة ولا ايه ؟
إلا صحيح ، هما قبضوا على القناصة بتوع حماس ولا لأ ؟ ولا لقوا صواريخ جراد إلي كانت متنشنة ولا لأ ؟ الناس إلي كانوا بيتعذبوا في رابعة ملقوش حد منهم وهما بيفضوا الميدان ولا لأ ؟
إلا صحيح ، بطايق الناس لقوها مع البلتاجي ولا هيطلعولهم بدل فاقد ؟
متفكرش كتير ، هات ديلك يمين شوية ، كمان شوية ، شمال بقى شوية صغيرين ، تمااااااااااااام كدة
ليست هناك تعليقات:
إرسال تعليق